Суперлига 21-туридан ўрин олган "Металлург" - "Насаф"(0:2) учрашувидан сўнг мезбонлар бош мураббийи Андрей Шипилов фикрларини билдириб ўтди.

"Яхши ўйин бўлди. 75 дақиқа давомида ўйин назоратини ўз қўлимизда ушлаб турдик. Биттагина тактик хато туфайли стандартдан гол ўтказиб юбордик. Рақиб яхши ўйнади, биз ҳам тактик томонлама улардан қолишмадик. Гол ўтказиб юборилгунга қадар жуда хотиржам эдим. Ўша вазиятни ҳали ўрганамиз, жуда қўпол хатога йўл қўйдик, тажрибали футболчилар бундай хатога йўл қўйишга ҳаққи йўқ. Нима ҳам дея олардим, "Насаф"ни табриклайман. Яхши жамоа ва яхши ўйин намойиш этмоқда.

Бугун захирадан майдонга тушганлар ўйинимизни кучайтира олишмади. Бобожоновни алмаштирганим менинг ҳам хатоим бўлди. У жуда ҳам фойдали ўйнаётганди. Вазиятлардан фойдалана олмаяпмиз. "Бухоро" билан ўйинда жуда кўп вазият яратгандик. Бугун у қадар кўп имконият яратмадик, лекин ҳеч бўлмаса дурангга лойиқ эдик. Бунинг сабабларини ўрганишимиз керак. Бўлмаса машғулотларда вазиятларни якунлаш борасида етарлича ишлаяпмиз. Эҳтимол бу жараённи тўхтатишимиз керакдир. Балки кимлардир футболда барча нарсага эришиб бўлдим деб ўйлаётгандир, бу фақат унинг шахсий фикри ва бу хато. Ҳар куни машғулотда исботлашинг керак. Машғулотда бор кучинг билан ишламасанг, тўп ҳам дарвозага кирмайди. Демак, маҳаллий ёшлардан топ ҳужумчилар излаймиз. Олдинда яна бешта тур қолди, футбол ўйнашни давом этамиз", - дейди Шипилов.