Ушбу рукнимиздаги энг сўнгги янгиликлар билан таништиришда давом этамиз.
«МЮ»га Почеттиньо керак
Aнглиянинг «Манчестер Юнайтед» жамоаси «Тоттенҳем» клубининг собиқ устози Маурисио Почеттиньони клубга таклиф этмоқчи.
"Manchester Evening news" нашрининг маълум қилишича, клуб аллақачон таклиф юзасидан аргентиналик мураббий билан алоқага чиққан.
Манбанинг маълум қилишича, Почеттино таклиф борасида бош қотирмоқда ва катта эҳтимол билан қишда жамоани қабул қилиб олади.
«Барселона»га Ндомбеле керак
Каталония супер клуби «Тоттенҳем»да ўз ўйинини йўқотиб қўйган Танге Ндомбеле билан шартнома имзолаш ниятида.
Клуб қишда сайловларга бор эътиборини қаратгани учун трансферни катта эҳтимол билан келаси мавсум стартида амалга оширади. "Goal" нашрининг маълум қилишича, футболчининг ўзи ҳам бошқа жамоада тўп суриш ниятида.
Эслатиб ўтамиз, бир неча ҳафта илгари унинг жамоа бош мураббий Жозе Моуриньо билан жанжаллашиб қолгани ҳақида хабар тарқалган, кўп ўтмай ҳаммаси ўз измига тушиб кетган эди.
Холанд кетадими?
Дортмунднинг «Боруссия» жамоаси ҳужумчиси Эрлинг Холанд мавсум сўнггида жамоада қолиши ёки кетиши борасида клуб бош директори Ханс-Ёахим Ватцке маълумот берди.
Унинг айтишига қараганда, жамоа келаси мавсумда футболчининг товон пулида кўрсатилган 75 миллион евро эвазига уни қўйиб юбомоқчи эмас. Ватцкенинг маълум қилишича, Эрлинг яна бироз Дортмундда қолиши лозим.
Bild нашрининг маълум қилишича, клуб аллақачон Мино Райола билан унинг жамоада қолиши борасида музокаралар бошлаб юборган.
Ҳедиранинг тақдири ҳал
Туриннинг «Ювентус» жамоаси ярим ҳимоячиси Сами Ҳедира борасида якуний қарорга келди.
"Tuttosport" нашрининг маълум қилишича, Ҳедира биринчилардан бўлиб қишки трансферга қўйиладиган футболчига айланди.
Манбанинг маълум қилишича, ярим ҳимоячи билан ПСЖ жамоаси жиддий қизиқиш билдирган, бироқ футболчининг ўзи МЛС вариантини маъқул кўрмоқда.
Жемерсон ортга қайтмоқда?!
Бразилиянинг «Коринтианс» жамоаси «Монако» клуби марказий ҳимоячиси Жемерсонни қўлга киритишга яқин турибди.
"Goal" нашрининг маълум қилишича, Бразилия клуби 28 ёшли ҳимоячини 700 минг евро эвазига ўз сафига қўшиб олади.
Манбанинг маълум қилишича, сешанба куни футболчи ўз ватанига етиб боради ва тиббий кўрикдан ўтади. Эслатиб ўтамиз, ҳимоячи «Монако» сафига 2016 йилда келиб қўшилган бўлиб, унинг ҳисобида 100 та ўйин мавжуд.
