Каталониянинг "Барселона" клуби раҳбарияти ўз тарбияланувчиси - Ансу Фати билан шартномани узайтириш ниятида, бироқ, музокаралар бир текисда давом этмаяпти.
Ансу Фати "Барселона" билан ҳамкорликни давом эттиришдан манфаатдор, аммо ҳужумкор футболчи билан амалдаги шартноманинг айрим қоидаларини талқин қилиш борасида маълум келишмовчиликлар бор.
"Барселона" раҳбариятининг фикрига кўра, Фатининг "кўк-анорранглар" билан амалдаги шартномаси 2022 йил ёзигача амал қилади,бироқ, бу битим яна икки йилга автоматик равишда узайтирилиши банди мавжуд.
Футболчининг, аниқроғи унинг отаси ва агенти Хорхе Мендеснинг позицияси шуки, шартноманинг якуний санаси 2022 йил июнигача. Шунинг учун Фати вакиллари битимнинг молиявий шартларини ўзгартирмасдан битимни бир томонлама узайтириш мумкин эмаслигини таъкидламоқда.
Эътиборли жиҳати шундаки, бундай воқеа Ансу шартномани имзолаш пайтида атиги 17 ёшга тўлганлиги ва 18 ёшгача бўлган футболчилар билан ФИФА уч йилдан ортиқ муддатга шартномалар тузишни тақиқлагани сабабли юзага келган.
