Coca Cola Суперлиганинг 23-туридан ўрин олган «Металлург» - «Бунёдкор» (2:3) учрашувидан кейин мезбонлар устози Андрей Шипилов ўз фикрлари билан ўртоқлашди.

- «Бунёдкор» ҳақли ғалабани қўлга киритди. Рақиб бутун ўйинни назорат қилди. 0:3 бемалол ўйнашди, совуққонлик билан ҳаракат қилишди, захирадаги футболчиларга имконият беришди. Биз эса, негадир қўрқдик. Кимдан, нега қўрқдик, билмадим. Ваҳоланки, рақиб сафида ҳам иккита оёғи ва иккита қўли бор футболчилар тўп сурди. Негадир 0:3 дан кейин уйғондик ва қандайдир иккита голни урдик. Таянч ярим ҳимоячилари «ухлади», дарвозабонимиз тушунарсиз хатоларга йўл қўйди. Ҳайронман, айтишга сўз йўқ. «Металлург»даги уч йиллик фаолиятимдаги энг ёмон ўйин десам бўлади.