"The Best FIFA Football Awards" маросими шу йилнинг 17 декабрь куни ўтказиладиган бўлди. Коронавирус пандемияси туфайли тадбир онлайн форматда бўлиб ўтади.

Номинациялар бўйича номзодларга овоз бериш жараёни эса 25 ноябрдан 9 декабрга қадар ўтказилади.

"Мазкур йилда соғлиқ барча нарсадан устун экани маълум бўлди. Футбол мусобақалари қайта бошланганидан кейин у инсонларга қувонч улашувчи кам сонли воқеага айланди. Хавфсизлик чораларидан келиб чиқиб тақдирлаш маросимини онлайн форматда ўтказишга қарор қилдик", – дейилад ФИФА матбуот хизмати тарқатган хабарда.

Анъанага кўра, маросимда 11та номинация бўйича ғолиблар аниқланади:

— йилнинг энг яхши футболчиси;
— йилнинг энг яхши аёл футболчиси;
— йилнинг энг яхши мураббийи (эркаклар жамоаларида);
— йилнинг энг яхши мураббийи (аёллар жамоаларида);
— йилнинг энг яхши дарвозабони (эркаклар жамоаларида);
— йилнинг энг яхши дарвозабони (аёллар жамоаларида);
— Йил рамзий жамоаси (эркаклар ва аёллар);
— "фэйр-плей" соврини,
— йилнинг энг яхши голи (Пушкаш соврини)
— "Fan Award" соврини.