«Барселона» бош мураббийи Роналд Куман маошининг камайтирилишига рози бўлди.

57 ёшли мутахассис клубнинг оғир иқтисодий аҳволини яхши тушуниб турибди. Куман ва унинг штаби «Барса» раҳбариятига маошларнинг пасайтирилишига қарши эмаслигини маълум қилишди. Бу ҳақда "Mundo Deportivo" хабар тарқатди.

Куман ўз қарорини «Барса» футболчиларига маълум қилмоқчи. Шунингдек, мутахассис клуб ўйинчилар ҳам маошнинг камайишига рози бўлишини истаётганини ўз шогирдларига маълум қилмоқчи.

Раҳбарият бу борада футболчиларга ўйлаб кўриш учун душанба кунигача вақт берган эди, аммо уларнинг аксарияти бу таклифга рози бўлмади.

Эслатиб ўтамиз, фақат Марк-Андре тер Стеген, Жерар Пике, Клеман Лангле ва Френки де Йонг маошнинг пасайтирилишига розилик билдиришди. Улар маошларни 30 фоизга камайтирган ҳолда клуб билан шартномани узайтиришди.