«Реал» ҳужумчиси Карим Бензема Европа чемпионлар лигаси гуруҳ босқичининг сўнгги тури доирасида Менхенгладбахнинг «Боруссия»га қарши ўйинда иккита гол уришга муваффақ бўлди (биринчи бўлимдан сўнг — 2:0).

Франциялик футболчи мусобақанинг гуруҳ босқичидаги голлари сонини 50тага етказиб олди. У бундай маррани забт этган бешинчи ўйинчига айланди.

Аввалроқ Лионель Месси (71), Криштиану Роналду (67), Рауль (53) ва Руд ван Нистелрой (50) шундай натижани қайд этишган эди.

Шунингдек, Бензема бугун "Реал" сафидаги 527-ўйинни ўтказмоқда. У "Қироллик клуби" сафида кўп ўйин ўтказиш бўйича легионерлар рекордига муаллифлик қилиб турган Роберто Карлоснинг натижасини такрорлади.