Ушбу рукнимиздаги энг сўнгги янгиликлар билан таништиришда давом этамиз.

Ауар «Арсенал»да!

Лондоннинг «Арсенал» жамоаси «Лион» ярим ҳимоячиси Уссам Ауар билан шартнома имзолаш фикридан қайтгани йўқ.

«AFC Ball » нашрининг маълум қилишича, футболчининг оиласи уни «Арсенал»га ўтишини истамоқда. Шу боис, футболчи билан «кононирлар» ўртасидаги шахсий шартнома борасида ҳеч қандай муаммо бўлмайди.

Аввалроқ футболчининг «Ювентус»га ўтиши борасида миш-мишлар пайдо бўлган эди.

Милик нишонда

Неаполнинг «Наполи» жамоаси аъзоси Аркадиуш Милик фаолиятини Италиянинг бошқа бир жамоасида ўтказишга яқин турибди.

26 ёшли футболчи учун «Фиорентина» яхшигина маош кўрсатилган узоқ йиллик шартнома имзолашга тайёр. «Наполи» ўз футболчиси билан янги шартнома борасида келишувга эриша олмаяпти. Шу боис, 2021 йилда эркин агентга айланадиган футболчи билан бир нечта жамоалар жиддий қизиқиб қолган.

Италия нашрларининг маълум қилишича, футболчининг ўзи ҳам «Фиорентина» билан шартнома имзолашга тайёр.

«Шеффилд»га у керак

Англиянинг «Шеффилд Юнайтед» жамоаси «Манчестер Юнайтед» клуби ярим ҳимоячиси Жесси Лингард билан шартнома имзоламоқчи.

«The Sun» нашрининг маълум қилишича, клуб инглиз футболчисини ярим мавсумга ижарага олишни режа қилган. Клуб шу йўсинда, жамоани элитада сақлаб қолишни режа қилган.

Эслатиб ўтамиз, аввалроқ Сулшернинг Лингард борасида ҳеч қандай режаси йўқ эканлигини ва уни катта эҳтимол билан клуб қишда қўйиб юбориши ҳақида хабарлар пайдо бўлган эди.

Эслатиб ўтамиз, футболчи билан шунингдек «Селтик» ва «Арсенал» клублари жиддий қизиқиб қолган.

«Реал»га у энди керак эмаc!

Мадриднинг «Реал» жамоаси «Ренн» жамоаси тинейжери Эдуардо Камавинганинг ўрнини босишга қодир янги футболчини кўз остига олди.

«Defense Central» нашрининг маълум қилишича, клуб нишонида «Брайтон» аъзоси Ив Биссума мавжуд.

Мадрид клуби айни дамда бор молиявий имкониятларини стадиони тўлиқ таъмирлашга қаратгани боис, «Ренн»нинг 70 миллионлик футболчисидан воз кечишга тайёр.

Манбанинг маълум қилишича, «Брайтон» ўз футболчисини 30 миллион евро эвазига қўйиб юборишга тайёр.

Фирпо «Наполи»да?!

Трансфер ҳуқуқи Каталониянинг «Барселона» жамоасига тегишли бўлган Эктор Фирпо фаолиятини «Наполи»да давом эттириши мумкин. 

«CDS» нашрининг маълум қилишича, 24 ёшли футболчи билан италияликлар жиддий қизиқиб қолишган. Гап шундаки, «Наполи» жамоасининг ҳимоячиларидан бир нечтаси мавсум сўнггида жамоасини алмаштириши кутилмоқда. Шу боис, клуб Фирпо трансферига қўл урмоқчи. 

Эслатиб ўтамиз, аввалроқ «Барселона» Эктор Фирпони трансферга қўйгани ҳақида хабарлар пайдо бўлган эди.