Аслида, футбол тарихида фақат 8 та футболчигина фаолияти давомида 500 та гол киритишга муваффақ бўлган. Stadion.uz бир жамоа сафида киритилган голлар борасида энг яхши натижа эга футболчиларни ёдга олади. Улар қаторида бугунги авлод мухлисларининг кўп эмаслиги сизни ҳайрон қолдириши мумкин.

10 ўрин. Криштиану Роналду 450 та гол - «Реал Мадрид»

Португалиялик футболчи Мадридда 9 мавсум тўп сурди ва 450 та гол киритди. Бунинг учун унга 438 та ўйин кифоя қилди. Ўртача қилиб олганда, криш ҳар йили «Реал» либосида 50 та гол киритишни уддалаган. Эндиликда, Криш янги рекорд сари одимламоқда. Агар у «Ювентус» сафида яна 19 та гол киритса, юзлик довони ошиб ўтади. Бу эса, уни «Манчестер Юнайтед», «Реал Мадрид» ва «Ювентус» сафида 100 та гол урган биринчи футболчига айлантириши турган гап.

9-ўрин. Эусебио 473 та гол - «Бенфика»

Кришни Португалия футболининг ўтмишдаги супер юлдузи ортда қолдирмоқда. «олтин тўп» ва «олтин бутса» эгаси 473 та гол киритиш учун атиги 440 та ўйин сарф этган холос. Шу сабабли, уни «Бенфика» клуби тарихидаги энг яхши футболчи деб ҳисоблашади.

8-ўрин. Уве Зеелер 507 та гол - «Гамбург»

Уве Зеелер “500 та гол» клубининг биринчи аъзоларидан саналади. Қаҳрамонимиз Гамбург шаҳрида таваллуд топди ва бутун фаолиятини шу шаҳар клубига бағишлади. «Динозаврлар» сафида 19 та мавсум тўп сурган Уве атиги 2 та соврин ютди холос. Шунга қарамай, жамоасини алмаштиргани йўқ. Унинг хайрлашув учрашувида эса, аренага 70 минг мухлис ташриф буюрди. Балки, шу ҳурмат ва эътибор учун у клубини алмаштиришдан бош тортгандир?!

7 ўрин. Жимми Жонс 517 та гол - «Гленавон»

Шимолий Ирландиянинг Лурган шаҳри шарафини ҳимоя қилувчи «Гленавон» жамоаси ҳақида эшитмаган бўлсангиз керак. Сабаби, бу шаҳар аҳолиси 20 минг кишини ҳам ташкил этмайди. Ваҳоланки, 20 аср ўрталарида бу ерда «Гленавон» жамоаси бутун мамлакат футболининг байроқдори бўлишга муваффақ бўлган. Унинг бошқа футболчилардан фақат битта фарқи бор эди. У гол киритиш учунгина майдонга тушар, ҳеч қачон медиа одам бўлишга интилмаган. Унинг бор кучи ҳам айнан самимий эканлигида бўлган бўлса, ажаб эмас.

6 ўрин. Жимми МакГоран 522 та гол - «Селтик»

20 асрнинг илк йилларида Жимми МакГоран шотландиялик футбол мухлисларининг ёқимтойи эди. 1920-30 йиллар оралиғида ҳужумчи нақд 550 та гол киритишга муваффақ бўлган. Бу голларнинг 522 таси «Селтик» либосида урилган бўлиб, бу бутун бошли Британия футболидаги мутлақ рекорд саналади.

5 ўрин. Йозеф Бицан 534 та гол - «Славиа»

Йозеф ўзининг футболчилик фаолиятини Австря клубларида бошлаган бўлсада, унга машҳурликни Чехиянинг «Славиа» клуби олиб келди. Қаҳрамонимиз бутун фаолияти давомида нақд 805 та гол киритган. Айрим нашрлар айнан уни футбол тарихида энг кўп гол киритган футболчи деб ҳисоблайди. Бунуи Пеле ва унинг мухлислари ҳали-ҳамон тан олишмайди.

4 ўрин. Фернанду Пейротеу 544 та гол - «Спортинг»

Лиссабонинг «Спортинг» жамоаси ҳужумчиси бугунги рўйхатимиздаги учинчи португалиялик футболчи. ХХ асрнинг ўрталарида «шерлар» шарафини ҳимоя қилган ҳужумчи нақд 12 мавсум давомида 5 та чемпионликни нишонлаган. Афсуски, у соғлиғидаги муаммолар сабабли бутсаларини 31 ёшда михга илишга мажбур бўлди. 60 ёшда эса, юрак ҳуружидан вафот эди. «Спортинг» раҳбарлари эса, унинг абадий хотираси учун хайкал бунёд этилган.

3-ўрин. Герд Мюллер 566 та гол - «Бавария»

«Бавария» жамоасида тўп сурган «халқ тўпурари» ортиқча таърифга муҳтож эмас. Мюллер туғма жангчи ва чинакам футбол фидойиси. У амалга оширган ишни Роберт Левандовски қанча уринмасин такрорлай олмайди. Балки, бошқа ҳеч ким такрорлай олмас?!

2 ўрин. Пеле - 643 та гол - «Сантос»

Пеле «Сантос» жамоаси шарафини 1956-1974 йиллар оралиғида ҳимоя қилган. Бразилиялик футбол қироли нақд 50 йил давомида бу рекордни ўзиники қилиб олди, аммо энди чекинадиган пайт яқинлашмоқда.

1-ўрин. Леонел Месси 643 та гол - «Барселона»

«Валенсия»га қарши учрашувда, Лео пенальтини амалга ошира олмади, аммо кўп ўтмай гол киритди. Бу унинг фаолиятидаги энг муҳим голлардан бири эди. Эътиборлиси шундаки, Месси бу ишни бош билан амалга оширди. Учрашувдан сўнг, қаҳрамонимизнинг манзилига табриклар ёғилиб кетди. Улар орасида Пеле айтган сўзлар барчанинг эътибор марказида бўлди:

«Сен бир клуб сафида тўп суриш ва ундан лаззат олиш қанчалар ёқимли эканлигини яхши биласан. Худди сен каби мен ҳам бундай мароқли воқеанинг шоҳиди бўлганман. Ҳар куни, битта жамоа ва битта ранг! Сени тарихий воқеа билан табриклайман. Сенинг ўйинларингдан завқ оламан лео!