Москванинг «Локомотив» клуби ярим ҳимоячиси Жасурбек Жалолиддинов фаолиятини Туркия ёки Испанияда давом эттириши мумкин. Бу ҳақда футболчининг агенти Юрий Белоус хабар тарқатди.

— Жасур — Ўзбекистоннинг энг иқтидорли футболчиларидан бири. У миллий терма жамоа сафида дебют қилди, Осиё чемпионлар лигасида ўйнади. Унинг ўйнашини барча истамоқда. «Локомотив» уни нима учун рўйхатдан ўтказиб, нима учун қайдномадан чиқарганини тушуниш қийин. Энди қандай йўл тутилишини кўрамиз. "Темирйўлчилар" уни дастлабки йиғинга олиб кетишни айтишди. Кейин билсак, бормаскан. Янги йил байрамидан кейин қарор қабул қилинади.

— Жалолиддиновга Европа клублари қизиқиш билдиришаётган экан.

— Ҳа. Ўзбекистонлик футболчиларни Корея, Амирлик клублари жон деб қабул қилишади, лекин у Россияда ўйнашини истардим. Агар бунинг имкони бўлмаса, «Локомотив» раҳбарияти билан гаплашамиз. Туркиядан ва Испания Сегундасидан таклифлар бор.

Эслатиб ўтамиз, 18 ёшли Жалолиддиновнинг «Локомотив» билан шартномаси 2025 йилга қадар тузилган. Ҳозирда у ижара асосида «Тамбов»да ўйнамоқда.