АГМК ўтган мавсумдаги қўлга киритган натижалари ва ОФК талаби доирасида лицензиялаш мажбуриятларини тўлиқ бажаргани учун янги мавсумда ОФК байроғи остидаги халқаро мусобақада қатнашиш хуқуқини қўлга киритди.

Жамоа ОЧЛ саралаш босқичи орқали гуруҳ босқичига йўлланма олишга ҳаракат қилади. Саралаш доирасида дастлаб ўтган йилги натижаларга кўра Ироқнинг иккинчи жамоаси бўлган «Ал Қува Ал Жавия» билан сафарда беллашади. Агарда ушбу тўсиқдан ўтиш уддаланса, кейинчалик плей-офф босқичида Қатарнинг тўртинчи жамоаси бўлган «Ал Гарафа» билан гуруҳ босқичи йўлланмаси учун яна меҳмонда беллашади.

Жамоанинг бўлажак рақиблари — «Ал Қува Ал Жавия» айни пайтда Ироқ чемпионатида 12-турдан кейин 22 очко жамғарган ҳолда 3-ўринни эгаллаб турибди. Эҳтимолий кейинги рақибимиз Қатарнинг «Ал Гарафа» жамоаси эса 11-турдан сўнг 22 очко тўплаган ҳолда 2-поғонани банд этмоқда.

АГМК ОЧЛ гуруҳ босқичига йўлланма олмаган тақдирда ҳам янги мавсумда халқаро мусобақада иштирок этади. ОЧЛ саралаш босқичидан муваффақиятли ўтилмаган тақдирда жамоамиз иштирокни ОФК кубоги гуруҳ босқичида давом эттиради.

АГМК ОЧЛ гуруҳ босқичига чиқадиган бўлса, унда ОФК кубогида юртимизнинг бошқа клуби Қаршининг «Насаф» жамоаси қатнашади.

ОЧЛ ва ОФК кубогининг янги мавсумига қуръа ташлаш маросими ва ўйинлар санаси эса кейинроқ ОФК томонидан эълон қилинади.