Токиода Император кубоги финали бўлиб ўтди. Ушбу турнирда нафақат профессионал клублар, балки ҳаваскор жамоалар ҳам иштирок этишади. Осиё Чемпионлар Лигаси учун бериладиган бир йўлланма эгаси айнан Император кубогида аниқланишининг ўзиёқ турнирнинг нуфузини кўрсатиб турибди.
Тарихда биринчи марта финалга иккинчи дивизион вакиллари йўл олишди. "Токио ФК" клуби "Киото Санга" клубига қарши баҳс олиб борди ва 4:2 ҳисобида ғалаба қозонди.
Ушбу соврин "Токио ФК" учун мавсумдаги иккинчиси ҳисобланади. Жамоа 2011 йилда лига ғолиблигини ва келаси йилдан олий дивизион — "Жей" лигада ўйнаш ҳуқуқини қўлга киритганди. Финалдаги рақиб бўлмиш "Киото Санга" эса еттинчи поғонани забт этганди.
Демак, "Токио ФК" 2012 йилги Осиё Чемпионлар Лигасининг гуруҳ босқичига тўғридан-тўғри йўл олди ва "F" гуруҳига жойлашди. Биринчи ўйинни 6 март куни, Австралияда, маҳаллий "Брисбан Роар" клубига қарши ўтказади.