Англиянинг "Ливерпуль" клуби собиқ бош мураббийи, айни пайтда Хитойнинг «Далянь Про» жамоасини бошқараётган Рафаэль Бенитес мерсисайдликларнинг эртага АПЛ доирасида «Манчестер Юнайтед»га қарши бўладиган ўйиндан олдинги фикрлари билан ўртоқлашди.

«Бундай ўйинлар жуда қийин кечади. «Ливерпуль» муваффақиятга эришади деган туйғу бор, лекин, тўғрисини айтганда, «МЮ» сўнгги пайтларда жуда яхши ўйин намойиш этмоқда.

Имкониятларни 50%-50% ҳисоблайман. Ёки агар юрагимга қулоқ соладиган бўлсам 60% - 40%.

Муаммо шундаки, «МЮ» ҳужумда юқори темпда ўйин намойиш этмоқда ва уларнинг футболчиларига бемалол ўйнашларига имкон бермаслик керак.

Бруну Фернандеш «МЮ»нинг муҳим футболчисига айланиб олди, у ўзининг ўйини, голлари ва голли узатмалари билан барча нарсани ўзгартириб юборди. У ажралиб турибди. У имкон бўлди дегунча шеригига пас бермоқчи бўляпти. Сўнгги ўйинларда у жуда катта иштиёқ билан ўйнади», – деди Бенитес The Times билан суҳбатда.