Stadion.uz Италия чемпионатида ўзини кўрсатаётган Элдор Шомуродов ҳақидаги қизиқарли маълумотлар билан ўртоқлашади.
«Ростов» жамоаси ҳужумчиси Элдор Шомуродов «Женоа» сафига ўтгач, секин-аста асосий таркиб футболчисига айланиб бормоқда. 25 ёшли ўзбек футболчиси А Серияда гол киритишни уддалади. Уни ҳатто «Ювентус» ҳам ўз сафига қўшиб олмоқчи. Италия нашрлари Элдорнинг трансфери борасидаги миш-мишларни кенг ёйишда давом этмоқда. «Le Gazzeta Della Sport» нашри эса, ҳамюртимизнинг А Серия кўникиб олиш жараёни ҳақида каттагина мақолани эълон қилди. Мақоланинг муаллифи Филиппе Грималди Элдорни «Женоа»нинг ягона умиди, деб атади.
«Шомуродов чинакам феномен! У «Женоа»нинг элитада жон сақлаб қолишини таъминлашга қодир сўнгги умид учқуни! У нафақат элитада қолиш, балки бахтли келажакни ҳам таъминлаб бериши мумкин бўлган умид учқуни. У ўз голлари ва майдондаги ҳаракати билан ўзига сарфланган пулларни оқлашга тушиб кетди. Эътиборлиси шундаки, Италияга ер шарининг умуман бошқа томонидан келган йигитнинг ижтимоий тармоқларда мухлислар сони тобора ортиб бормоқда.
Ҳозирги «Женоа» ўзбек учун ўзини кўрсатиш учун қулай имконият. У тўп билан яхши муносабатда бўлади. Керакли паллада узоқ масофага тезлик намойиш эта олади. Иккинчи қаватда ҳам жуда фаол. 25 ёшли ҳужумчи учун бу омиллар супер даражага кўтарилиш учун кўмак бериши аниқ.
«Гриффонлар»нинг янги бош мураббийи – Давиде Баллардини ўзбекнинг ўйинидан кўнгли тўлаётгани аниқ. Мураббий ўзининг сўнгги интервьюларида Осиёдан келган футболчининг машғулотларда қандай тер тўкаётгани ҳақида айтиб берди. «Лацио»га қарши учрашувдан сўнг, Элдор ҳақида ҳамма фикр билдиришни бошлади.
Сўнгги маълумотларга қараганда, Элдор итальян тилини ўрганишни бошлаб юборган. Бу унга Апеннин ярим оролида узоқ қолишига кўмак беради. Гап шундаки, унинг инглиз тили Баллардини билан мулоқот учун камлик қилмоқда. Ҳозирда, Элдорнинг таржимони сифатида молдавиялик ҳимоячи Даниел Думбравану иштирок этмоқда. Яхшиям шу футболчи бор экан, акс холда ҳужумчи кўплаб муаммолар ўчоғида қолиб кетиши мумкин эди.
25 ёшли футболчи ўзбек миллий таоми – ошни жуда соғинган. Шундай бўлса-да, Элдор бунга кўникишга тайёр. У тезроқ Италия футболи билан танишиб олиш мақсадида интилмоқда. У прогресс жараёнида.
Сўнгги пайтларда унинг келажаги борасида турли миш-мишлар урчиб кетди. «Ювентус» томонидан қизиқиш бўлгани қанчалар ҳақиқат эканлигини сир бўлиб қолди. Элдорнинг агенти – Қаҳҳор Мўминов бу воқеага ойдинлик киритишни истамади. «Ростов» бош мураббийи – Карпин эса бунга ижобий муносабат билдирди:
«Бўридан қўрққанлар ўрмонга кирмайди»
Ўша куни Россия футболидаги таниқли инсайдерлардан бири Нобель Арустамян ўз ижтимоий тармоғида вазиятга баҳо берди. Унинг айтишича, қишда Элдорни «Женоа» сотмайди. Ёзда эса, ҳамма нарса бўлиши мумкин. Шуниси аниқки, Элдор «Ювентус»нинг шорт-листидан ўрин эгаллаган».
