Лондоннинг "Челси" клуби ҳужумчиси Дидье Дрогба ўз жамоаси билан расман хайрлашди, дея хабар тарқатмоқда, Daily Express. Маълумотларга қараганда Африка кубогига йўл олган футболчи, мусобақа тугагач Лондонга қайтмайдиган бўлди.
Ҳужумчи Англия Премьер-лигасининг сўнгги турида, "Вулверхэмптон"га қарши баҳсда жамоа қайдномасидан жой ола билмаганди. "Астон Вилла"га қарши кечган учрашув эса, Дрогбанинг "Челси" сафидаги сўнгги ўйини бўлиб қоладиган бўлди.
Ўтан ҳафтада Лондон клуби расмийлари Дрогбага янги шартнома таклиф этишдан бош тортишган. Шундай қилиб футболчи қишки трансфер дарчаси чоғида бошқа клубга ўтиши аниқ бўлди.
Футболчи билан жиддий равишда қизиқаётган Хитойнинг "Шангхай Шенхуа" клуби Дрогбани ҳамон ўз сафида кўришни истамоқда. Хитой клуби футболчи учун 3 йилга 30 миллион евро тўлашга тайёр турибди. Ҳужумчига Европанинг бошқа бир қатор жамоаларидан ҳам таклифлар бор. Жумладан, ўзининг собиқ жамоаси, Франциянинг "Марсель" клуби ҳам ҳужумчини ўз сафида кўришга қарши эмас.
Аммо, кўпчликнинг фикрича футболчи, Африка кубоги якунлангач "Шангхай Шенхуа" клуби билан шартнома имзолаши мумкин. Хитойликлар яқинда, Дрогбанинг бошқа бир жамоадоши, Николя Анелькани ўз сафларига қўшиб олишган эди.
