Яқин вақт ичида "Анжи"ни тарк этиши кутилаётган Диего Тарделли Россиядан тушган таклифни қабул қилгани хато қарор бўлганини тан олди. Бу ҳақда Бразилиянинг Bandeirantes радиоси хабар бермоқда.
"Анжи" вакиллари сешанба куни мен билан боғланиб, Бразилия жамоалари билан музокаралар олиб бормасликлари ҳақида огоҳлантиришди. Бунга сабаб, ватаним жамоалари менинг трансферимни фақат бўлиб-бўлиб тўлай оладилар, холос", деди Тарделли.
"Аммо "Анжи"дагиларнинг айтишича, менга Қатар клубларидан қизиқиш билдирилаётган экан. Менинг оиламга Россия ёқмайди. Агар Қатарга кўчиб ўтсам нимадир яхши томонга ўзгарар", деди бразилиялик футболчи.
"Умуман, йўлимда "Анжи" пайдо бўлиб қолганидан афсусланаман. Бошида фаолиятимни Махачқалъада давом эттириш тўғри қарор деб ўйлагандим. Бироқ амалда ҳаммаси ўйлаганимдан бошқачароқ бўлиб чиқди", дея қўшимча қилди Диего Тарделли.
Маълумот ўрнида, Бразилия терма жамоаси сафида бешта учрашувда майдонга тушган Тарделли ўтган йилнинг март ойида 7,5 миллион евро эвазига "Атлетико Минейро" клубидан сотиб олинганди.
Эслатиб ўтамиз, аввалроқ "Анжи"нинг ушбу бразилиялик футболчиси Тошкентнинг "Пахтакор" клубига ўтиши мумкинлиги ҳақида хабарлар тарқалганди. Аммо клуб вакиллари ушбу хабарларни рад этишганди.
