«Милан» бош мураббийи Стефано Пиоли Италия кубогининг чорак финал босқичи доирасида «Интер»га қарши бўлиб ўтган ўйин (1:2) борасида ўз фикрини билдириб ўтди.

«Мусобақада ғолиб чиқишни истагандик, афсусдаман. Майдонда бир киши кам бўлиб қолганимиздан кейин аҳволимизга оғирлашди.

Златаннинг Лукаку билан можарога боргани дербига таъсир кўрсатдими? Таъсир қилди. Чунки биринчи сариқ карточка иккинчисига олиб келди. Улар —кап-катта эркаклар, бир-бирларига нимадир дейишди. Нима дейишганини билмайман. Златан иккинчи сариқ карточкани рақибни тўхтатиш ва жамоага ёрдам бериш учун ҳаракат қилгани учун олди.

Ўн киши бўлиб ўйнаш анча қийин бўлди. Боз устига, рақибга пенальти совға қилдик. Ҳар қандай ҳолатда ҳам ушбу мағлубият фақат салбий ҳиссиётларни тақдим қилмади.

Учрашув тенгма-тенг кечди, четлатиш ўйинга таъсир кўрсатди. Агар таркиб жиҳатдан тенг бўлганида, натижа бошқача бўлиши мумкин эди», – деди Пиоли.