Ушбу рукнимиздаги энг сўнгги янгиликлар билан таништиришда давом этамиз.
Чалоба «Лестер»да?!
Англиянинг «Уотфурд» жамоаси ярим ҳимоячиси Натаниел Чалоба фаолиятини бошқа жамоада давом эттириши мумкин.
26 ёшли футболчи билан «Лестер» клуби жиддий қизиқиб қолган. Агар бу трансфер амалга ошса, «тулкилар» «Уотфурд»га 10 миллион евро тўлаб бериши лозим.
Эслатиб ўтамиз, Чалоба Лондоннинг «Челси» жамоаси академияси тарбияланувчиси саналади.
«Милан»га у керак
Миланнинг «Милан» жамоаси Диего Далотни ўз таркибида олиб қолмоқчи. «Daily Star» нашри берган хабарларга қараганда, «россонерилар» ҳимоячининг ўйинларидан қониқиш ҳосил қилган. Шу боис, унга янги шартнома таклиф этиш ҳақида бош қотирмоқда.
Манбанинг маълум қилишича, 21 ёшли футболчини «Манчестер Юнайтед» ортга қайтармоқчи эмас. Шу боис, мавсум сўнгида, томонлар трансфер суммаси борасида келишувга эришиши кутилмоқда.
«Ливерпул»га Диоп керак
Лондоннинг «Вест Ҳем» жамоаси ҳимоячиси Исса Диоп фаолиятини гранд жамоада давом эттириши мумкин.
«Daily Star»нинг маълум қилишича, 24 ёшли футболчини «мерсисайдликлар» ижарага олиш борасида таклиф тайёрламоқда.
Манбанинг маълум қилишича, «Ливерпул» ҳимоячини 20 миллион еврога сотиб олиш шарти билан ижарага олишни режалаштирмоқда.
Хедира «Герта»да?!
Германиянинг таниқли нашри - «Kicker»нинг хабар беришича, Сами Хедира айни дамда «Герта» клуби билан шартнома имзолаш арафасида.
33 ёшли футболчи бугун тиббий кўрикдан ўтди. Манбанинг маълум қилишича, ярим ҳимоячи янги жамоаси билан 2,5 йиллик шартнома имзолайди.
Эслатиб ўтамиз, аввалроқ футболчини Россия клубларидан бири билан шартнома имзолаши ҳақида хабарлар пайдо бўлган эди.
Тосун қайтади
Англиянинг «Эвертон» клуби ҳужумчиси Женк Тосун фаолиятини Туркияда давом эттиришга яқин турибди.
«Sky Sports» нашрининг маълум қилишича, туркиялик футболчи «Бештикташ» билан музокаралар олиб бормоқда.
29 ёшли футболчи Англияда ўйин амалиётга эга бўлмаяпти. Шу боис, мавсум сўнггига қадар Туркияда ижара асосида тўп суришга қарор қилган.
