"Рома" қишки трансфер ойнаси вақтида ўз таркибини "ПСЖ" ҳимоячиси Диего Лугано ҳамда "Ювентус" ҳужумчиси Амаурини билан тўлдиришни режалаштирмоқда, ёзда эса "Удинезе"нинг чилилик ўйинчиси Маурицио Ислани сотиб олиш кўзда тутилган. Бу ҳақда "Football Italia" интернет-нашри хабар бермоқда.
Жамоа марказий ҳимоячиси Николас Бурдиссо Аргентина терма жамоаси таркибида жароҳат олиб, олти ойга сафдан чиққанидан сўнг жаллоросси раҳбарияти унинг ўрнига муносиб номзод ахтармоқда. Италиянинг "Corriere dello Sport" газетаси тарқатган хабарга кўра, Уругвай терма жамоасининг 31 ёшли сардори "Рома"нинг январдаги асосий нишони бўлиб, жамоа раҳбарияти футболчини кўнгилли бир нархга сотиб олишни режалаштирмоқда.
Шунингдек, ҳужумчи Марко Боррьелло "Ювентус"га мавсум охирига қадар ижарага берилгани, Пабло Даниэль Освалдо эса жароҳат олиб, икки ойга сафдан чиққани сабаб ҳужум чизиғида ҳам муаммо юзага келган. Шу муносабат билан "Рома" спорт директори Вальтер Сабатини "Юве" захирасида қолиб кетаётган Амаурини пойтахтга олиб келиш мақсадида.
Бундан ташқари, "Рома" "Ювентус"нинг бошқа бир футболчиси - Фабио Квальяреллага ҳам қизиқиш билдираётган бўлиб, уни қўлга киритиш учун жамоа Давид Писаррони "Ювентус"га бериши ҳам мумкин.