Анталияда юзага келган ноқулай об-ҳаво шароити туфайли "Пахтакор"нинг Германия Бундеслигаси вакили - "Вердер"га қарши ўртоқлик учрашуви бекор қилинди. Жамоанинг янги бош мураббийи - Деян Журжевич юзага келган ҳолат бўйича ўз фикрларини билдираркан, табиат инжиқлиги жамоага панд берганини таъкидлаб ўтди. Бу ҳақда "Пахтакор" расмий сайти хабар бермоқда.
"Албатта, табиатнинг бугунги инжиқлиги бизга панд бермай қолмади. Ҳар қандай вазиятдан чиқиб кетиш керак. Ўйин бўлмаса, эътиборни бошқа машғулотларга қаратамиз", деди "Пахтакор" устози.
"Пахтакор" расмий сайти хабарига кўра, "бугунга белгиланган икки маҳаллик машғулот фитнес залида бўлиб ўтди, бунда асосий эътибор футболчиларнинг жисмоний ҳолатини яхшилашга қаратилди".
"Мақсадимиз, Олий Лига ва Осиё Чемпионлар Лигасида муносиб иштирок этиш экан, бизни кутиб турган муҳим ўйинларга жиддий тайёргарлик кўришимиз шарт. Асосийси, расмий ўйинлар бошлангунга қадар шогирдларим оптимал ҳолатда бўлишса бас. Бугунги барча ҳаракатларимиз айнан шунга қаратилган", деди "Пахтакор" бош мураббийи Деян Журжевич.
