Саудия Арабистони Про-лигасининг 15-туридан сўнг "Ал-Аҳли" жамоаси ниҳоят "Ал-Ҳилол"ни қувиб етди. Хабарингиз бор, "Ал-Ҳилол" ва "Аш-Шабоб" жамоалари 0:0 ҳисобида дуранг ўйнаб, очколарни бўлишиб олишган эди. Бу икки етакчи жамоалар сўнгги 4турнинг 3тасида дуранг натижага эришиб, таъқибчиларига имконият яратиб бермоқда.
Бундан эса "Ал-Аҳли" унумли фойдаланмоқда. Франсиско Матурана шогирдлари сўнгги турда меҳмонда "Ан-Наср" устидан 3:1 ҳисобида эришилган ғалабадан сўнг 36 очко тўплаб, "Ал-Ҳилолдан" фақат тўплар нисбатига кўра ортда қолмоқда. Улардан бир очко кам тўплаб турган Сервер Жепаров тўп сураётган "Аш-Шабоб" эса кучли учликни якунлаб турибди.
Пахтакорнинг ОЧЛ даги рақиби "Ал-Иттиҳод" эса сўнгги учрашувини "Ал-Фатҳ"га қарши меҳмонда ўтказиб, 3:2 ҳисобида мағлубияти эвазига жадвалнинг 6-поғонасига тушиб кетди.
