"Бунёдкор" ёшлар жамоасига қозоғистонлик мутахассис Андрей Пинчуков раҳбарлик қилади. Бу ҳақда Sports.kz интернет-нашри хабар бермоқда.
Қозоғистоннинг Семипалатинск вилояти футболи афсонаси, шу вилоятнинг бош жамоасидаги ўйинлари сони бўйича рекордчи ҳисобланган 54 ёшли мутахассис учун бу Ўзбекистондаги илк фаолият эмас. Бунгача у Виктор Кумиковнинг ёрдамчиси сифатида "Машъал" ва "Насаф" жамоаларида иш олиб борган. Sports.kz маълумотига кўра, Пинчуков Ўзбекистонда жами олти йил давомида фаолият олиб борган.
Ўтган мавсум у Семипалатинскнинг "Спартак" клубида иш олиб бориб, мавсум давомида унинг бош мураббийига ҳам айланганди. Қозоғистон Биринчи лигасида иштирок этувчи жамоа 14-ўринни эгаллаган.
2011 йилги мавсумни Роберт Гай қўл остида ўтказган "Бунёдкор" ёшлар жамоаси Ёшлар Лигасида 5-ўринни эгаллаган.
