"Парма" бош мураббийи Франко Коломба "Интер"га қарши Италия чемпионати 17-тур учрашувидан сўнг ўз фикрлари билан ўртоқлашаркан, жамоадаги ҳолатни клуб раҳбарияти билан муҳокама қилишини айтиб ўтди.
Эслатиб ўтамиз, "Интер"га қарши учрашувда пармалик футболчилар йирик - 0:5 ҳисобида имкониятни бой беришди. Диего Милито дублга эришган бўлса, Тиаго Мотта, Паццини ҳамда Фараонилар битта голни ўз ҳисобларига ёзиб қўйишди.
"Ўйлашимча, жамоам "Интер"га майдонда хоҳлаган ишини қилиш учун осон шароит яратиб берди. Шунинг учун ҳам миланликлар шундай катта устунлик билан ғалаба қозонишди", деди Коломба.
"Биз ўзимизда бўлган имкониятлардан фойдалана олмадик ва бунинг учун жуда катта ҳақ тўладик. "Сан-Сиро"да мағлубиятга учраш мумкин, аммо бундай кўринишда эмас. Биз ҳимоядаги муаммоларни нима қилиб бўлса-да бартараф этишимиз зарур. "Парма" сўнгги учрашувларда жуда ҳам кўп гол ўтказиб юбораяпти", деди "Парма" бош мураббийи.
"Вазиятни ўнглаш учун нима қилиш мумкинлигини раҳбарият билан муҳокама қилиб чиқамиз. Мураббий жамоа унга ишонаётганини ҳис қилиб ишлаши керак", дея қўшимча қилди Франко Коломба.
"Парма" Италия чемпионатидаги 17 тур учрашувларидан сўнг 19 очко билан мусобақа жадвалида 13-ўринни эгаллаб турибди.
