Сербия ҳуқуқни муҳофаза қилиш органлари томонидан «Партизан» футбол клуби мухлислар гуруҳи панасида фаолият юритаётган жиноий гуруҳ етакчилари Велко Беливука ва Марко Милкович қўлга олинди.

Беливука жиноий тўдаси наркотик моддалар ва қурол савдоси, ўғрилик билан шуғулланган, шунингдек, кўплаб қотилликларга қўл урган. 8 февраль куни мафия аъзолари уюшган жиноятчиликка қарши уруш очган Сербия президенти Александр Вучичга суиқасд ҳозирлаётгани маълум бўлган.

Полиция қатор тинтувларни ўтказган, хусусан, «Партизан» стадионидаги бункер ҳам тинтув қилинган. Жиноий гуруҳ аъзолари бункердан ўз мақсадлари йўлида фойдаланган, унинг калитлари фақат Беливука ва унинг яқинларида бўлган. Тинтув вақтида бинодан кишан калитлари, резина болғалар ва мобил алоқа сигналларини тўсувчи мосламалар топилган.

Экспертлар қон излари ва одам суяги бўлакларига дуч келган. Полиция тахминларига кўра жиноий гуруҳ бункерда одамларни қийноққа солган ва ўлдириб юборган, кейин эса мурдалар бўлакларга бўлиниб, махфий жойга олиб кетилган. Маълум бўлишича, сўнгги 1,5 йилда ўндан ортиқ киши жиноятчилар қурбонига айланган. Ўрганилган видеотасвир маълумотларига кўра, икки киши стадион бункерига кирган ва у ердан қайтиб чиқмагани аниқланган.