Ғузор клуби "Насаф"нинг собиқ дарвозабони Михаил Наумов билан икки йиллик шартнома имзолади. Бу ҳақда "Шўртан" расмий сайти хабар бермоқда.
2011 йилги мавсумни "Шўртан" таркибида якунлаган грузиялик дарвозабон Михаил Алавидзе Олий Лигада легионер дарвозабонлар хизматидан воз кечилганидан сўнг клубни тарк этганди. Алавидзенинг ўрнини тўлдириш учун Михаил Наумов таклиф этилганди.
"Шўртан" расмий сайти хабарига кўра, 7 январь куни Михаил Наумов клуб раҳбарияти билан шартноманинг молиявий бандларини келишиб олган ва "Шўртан" билан 2 йиллик битимга имзо чеккан.
"Шўртан" билан шартнома имзолаганимдан хурсандман. Мавсум якунига етганидан сўнг бир нечта клублардан таклифлар бўлганди. Уларнинг орасида "Шўртан" ҳам бор эди. Янги жамоам сўнгги икки йилда ижобий ўзгаришларни амалга ошира олди ва йилдан-йилга ўз олдига юқори мақсадларни қўйиб келмоқда. Қолаверса, Игорь Криушенко ҳам тажрибали мураббий эканлиги олиб бораётган машғулотларидан билиб олса бўлади. Насиб қилса, "Шўртан" жамоасида ўзимнинг бор кучимни ишга соламан ва олдимизга қўйилган вазифани бажаришга астойдил ҳаракат қиламан", деди Наумов клуб расмий сайтига берган интервьюсида.
Эслатиб ўтамиз, Михаил Наумовгача "Қизилқум" жамоасида ҳаракат қилган Обид Жўрабоев ҳам "Шўртан" билан икки йиллик шартнома имзолаганди.
