Донецк шаҳрининг бир гуруҳ альпинистлари Украина ва Польшада бўлиб ўтадиган ЕВРО-2012 мусобақасининг бошланиш арафасида Эверест тоғининг чўққисида футбол ўйинини ўтказишни режалаштиришмоқда.
Бу ҳақда Донецк области альпинизм федерацияси раиси Сергей Ковалёв шундай хабар беради: "Альпинистларимиз ЕВРО-2012 га бағишлаб, Эверест чўққисида футбол ўйнашмоқчи. Албатта буни хар томонлама қўллаб-қувватлайман ва Украина ўзининг дастлабки голини ер куррасининг энг баланд нуқтасида киритишини истайман".
Тўлақонли футбол ўйини 5600 метр баландликда жойлашган спортчилар лагерида бўлиб ўтади. "Чўққининг ўзида жой йўқ, лекин 50 метр пастроқда мини футбол майдончаси катталигида дўнглик бор. Майдонча қияроқ бўлсада, тўпга бир-икки зарба бериб, гол киритиш имконияти мавжуд", - деди Ковалёв акцияга аниқлик киритар экан.
Эверест чўққисига олиб чиқиладиган тўпга Украинанинг энг яхши футболчилари имзо чекишади деб хабар беради ЕВРО-2012 ахборот маркази.
