Бугун — Осиё чемпионлар лигаси гуруҳ босқичига мезбонлиги учун ариза топширишнинг сўнгги куни. Аммо "Футболиум" телеграм-каналининг араб ОАВга таяниб хабар тарқатишича, Ғарб минтақасида мезбонлик масаласи деярли ҳал бўлган.

Унга кўра, Ғарбда гуруҳ босқичи ўйинлари Саудия Арабистони ва Бирлашган Араб Амирликларида бўлиб ўтади.

Агар маълумот рост бўлиб чиқса, "В" гуруҳидан ўрин олган "Пахтакор" клуби ўз ўйинларини БААнинг Шаржа шаҳрида ўтказади. Ушбу гуруҳдан "Шаржа" (БАА), "Трактор" (Эрон) ҳамда "Ал-Ваҳда" (С.Арабистони)/"Завра" (Ироқ") жуфтлиги ғолиби ўрин олади.

АГМК гуруҳ босқичи йўлланмасини қўлга киритса, Миржалол Қосимов жамоаси Саудиянинг Ар-Риёд шаҳрига йўл олади.

Шарқ минтақасида эса марказлашган ҳолда ўтказиладиган гуруҳ босқичига мезбонлик қиладиган мамлакатлар номини аниқлаш муаммо бўлади. Чунки, у ерда деярли барча мамлакатда пандемия туфайли чекловлар мавжуд.