"Ювентус" бош мураббийи Антонио Конте Италия чемпионати 17-туридан ўрин олган "Лечче"га қарши баҳс оғир бўлишини кутганини айтиб, ўйиндан кейин Боррьеллонинг трансферини ҳам ҳимоя қилиб чиқди. Бу ҳақда "Football Italia" интернет-нашри хабар бермоқда.
"Рома"дан ижарага олинган ҳужумчининг трансферини "Ювентус" ишқибозларига маъқуллашмаяпти. "Лечче"га қарши учрашувда жамоа ишқибозлари: "Боррьелло, ғурур ва ориятсиз ёлланма", деган баннер кўтаришган.
"Боррьелло ҳар томонлама "Ювентус"га мос келадиган футболчи ҳисобланади. У нима учун "Ювентус"га ўтган мавсумда ўтмаганини тушунтириб бера олди, деб ўйлайман. Жамоамиз ўтган йили уни сотиб олиш учун етарлича маблағга эга эмасди, шунинг учун ҳам у "Милан"дан "Рома"га йўл олган. Бироқ у "Ювентус"га рад жавобини бермаган. Бунақа таклифни фақат аҳмоқларгина рад этиши мумкин", деди Конте.
"Football Italia"нинг ёзишича, Боррьелло кутилганидан аввалроқ фойдаси тегиб қолиши мумкин, чунки "Лечче"га қарши учрашувда Фабио Квальярелла жароҳат олиб, сафдан чиқди.
"Мен аввал ҳам айтгандим, танаффусдан кейинги биринчи ўйин, айниқса "Ювентус" ҳали бирор марта ҳам мағлубиятга учрамаган бўлса, жуда хавфли бўлади", деди "Ювентус" устози.
"Уч очко қўлга киритганимиз яхши бўлди, аммо ўйин тақдирини муддатидан аввал ҳал қилиб, ўзимизни ортиқча муаммодан ҳал қилсак бўларди. Биз ўйинда бир қадар сермаҳсулроқ ўйин кўрсата олардик. Биз битта учрашувда эмас, бутун мавсум давомида барқарор ўйин кўрсатишимиз керак", деди "Ювентус" бош мураббийи Антонио Конте.
