Менхенгладбахнинг «Боруссия» клуби бош мураббийи Марко Розе жамоани тарк этиб, «Дортмунд»ни бошқаришга қарор қилди. Бу ҳақда гладбахликлар расмий сайти хабар тарқатди.

Мураббий ўз жамоаси билан шартномаси якунланишига бир йил қолганида жамоадан кетишга қарор қилди. «Боруссия Дортмунд» эса 5 миллион евро миқдорида компенсация тўлайди.

"Сўнгги бир неча ҳафтада биз Розе билан ушбу масалани кўп муҳокама қилдик, – деди гладбахликлар спорт директори Макс Эберль. – Унинг Дортмудга ўтиш мақсади ўзгармади, аммо мавсум охирига қадар жамоа Чемпионлар лигаси муваффақиятли иштирок этиши ҳамда Бундеслигада имкон қадар юқори ўринни эгаллаши учун қўлдан келган барча ишни қилади".

Ҳозирда «Боруссия Менхенгладбах» Бундеслигада 6-7 ўринларни эгаллаб турибди. Жамоа 4-ўриндаги жамоадан 6 очко ортда қолмоқда. Жамоа 1/8 финал босқичида "Манчестер Сити" билан тўқнаш келади.

Розе мураббийлик фаолиятида "Локомотив Лейпциг", "РБ Зальцбург" ва "Боруссия М" жамоаларини бошқарган.