"Рома" сардори Франческо Тотти Италия чемпионати 17-туридан ўрин олган "Кьево"га қарши учрашувдан сўнг ўз фикрлари билан ўртоқлашаркан, жамоа ўйинидан қониқиш ҳосил қилганини айтиб ўтди.
Учрашув римликларнинг 2:0 ҳисобидаги ғалабаси билан якунига етди. Ўйинда киритилган ҳар иккала голга 35 ёшли Тотти муаллифлик қилди. Голлар пенальтилардан кейин киритилди. Ушбу голлар Тотти учун 2011 йилнинг 22 майидан бери Италия А Сериясидан урилган дастлабкилари бўлди.
"Жамоамизнинг бугунги ўйинидан қониқиш ҳосил қилдим. Бугун мен жуда ҳам узоқ кутган голларим эвазига ғалаба қозондик. Тез орада гол ура олишимни ҳис қилиб тургандим. Ҳатто "Кечикканим учун кечиринг" деган махсус майка тайёрлаб, уни футболкам остидан кийиб ҳам олгандим. Бармоғимни оғзимга солиб нишонлаганим иккинчи голни мен фарзандларимга бағишладим. Улар ҳар доим менга содиқ", деди "Рома" сардори.
"Биз яхши ўйин кўрсатдик, қишки байрамлар арафасида ҳам аъло даражадаги ўйинларни ўтказгандик. Муҳим томони, биз янги йилни ҳам тўғри кайфиятда бошлай олдик. "Фиорентина"дан қабул қилинган мағлубият жамоамиз учун ҳал қилувчи ўйин бўлди, деб ўйлайман. Шундан сўнг жамоа мураббийнинг атрофида жипслаша олди ва энди бу ўз мевасини бермоқда", дея қайд этиб ўтди "Рома" ҳужумчиси Франческо Тотти.
