“Шўртан”га қарши назорат-синов баҳсида “Бунёдкор” таркибида беларуслик футболчи майдонга тушди.
Савол туғилади, ким у? Жавоб берамиз – Дмитрий Рекиш.
Айни пайтда “Бунёдкор” кўригида бўлиб турган ушбу футболчи ҳақидаги илк таассуротлар ёмон эмас. Воқеалар ривожи унинг жамоада қолиш-қолмаслигига ойдинлик киритиб беради.
Бизнинг маълумот:
Дмитрий Васильевич Рекиш
Туғилган санаси: 14.09.1988
Туғилган жойи: Бобруйск шаҳри, Беларусь
Бўйи: 185 см
Вазни: 77 кг
Амплуаси: ярим ҳимоячи
Бобруйск шаҳридаги 5-сонли болалар-ўсмирлар футбол мактаби тарбияланувчиси. Биринчи мураббийи – В.Н.Павловский.
2004 йили Дмитрий Рекиш Минскнинг “Динамо” жамоаси аъзосига айланди. 2009 йили эса чемпионатнинг кумуш медалларини қўлга киритди. Умумий ҳисобда, Рекиш минсликлар таркибида 54та учрашув ўтказиб, 6 та гол урган.
2011 йил “Амкар” жамоаси кўригида иштирок этди. Бироқ ўша пайтда пермликларнинг мураббийлар штабида юз берган ўзгариш оқибатида у ортга қайтишга тўғри келди. Футболчи билан “Кубань” клуби ҳам қизиқиш билдирган. Бироқ у 2011 йилнинг 21 февраль куни Варшаванинг “Полония” клуби билан қисқа муддатли шартнома имзолади.
2011 йили Данияда ёшлар ўртасида бўлиб ўтган Европа чемпионатининг бронза медаллари соҳиби. У Белорусь ёшлар термасида 27 учрашув ўтказиб, рақиблари дарвозасига 8та тўп киритган.
27 октябрда Минскнинг “Динамо” клуби билан шартомаси якунланган ва у ҳозирги кунда эркин агент мақомига эга.
Ноябрь ойида Германия иккинчи бундеслигаси вакили “Фортуна” (Дюссельдорф) уни ўз йиғинларига таклиф этди.
