"Барселона"нинг собиқ бош мураббийи Лаураено Руис испан нашрларига берган интервьюсида Каталония клуби ярим ҳимоячилари Хави, Иньеста ва ҳужумчи Лионель Мессини алоҳида мақтаб ўтди.

Руиснинг сўзларига кўра, Хавида бошқаларда йўқ нарса бор.

"Хави тўпга ҳамма қатори зарба беради. Аммо унда шундай бир нарса борки, у бошқаларда йўқ: бу — учинчи кўз. У ҳеч ким кўрмаётган бўш зоналарни топиб, тўп ўша жойга етказиб беради", деди "Барселона"нинг собиқ устози.

"Агар Хави футболнинг ўзи бўлса, Иньеста — ундаги сифатдир. Месси бўлса жаҳондаги энг яхши футболчи. Биз Хавининг тўп узатиш қироли, деб таърифладик, бироқ Месси фақат гол уравермайди. У ҳам аъло даражадаги тўп узатишларни амалга ошира олади", дея қўшимча қилди Руис.

9 январь куни жаҳон футболининг 2011 йилдаги энг яхшиларини тақдирлаш маросими бўлиб ўтди. ФИФА "Барселона" ҳужумчиси Лионель Мессини 2011 йилнинг энг яхши футболчиси деб топган бўсла, Хави сўровномада Мадриднинг "Реал" клуби ҳужумчиси Криштиану Роналдудан кейин учинчи ўринни қўлга киритди.