Бугун, аниқроғи Тошкент вақти билан ҳисоблаганда 20:15да Испания Ла Лигаси 25-тур доирасида «Севилья» ва «Барселона» жамоаси ўртасидаги қарама-қаршиликка гувоҳ бўламиз. «Роман Санчес Писхуан» стадионида ўтадиган мазкур баҳсга икки жамоа ҳам турлича кайфиятда ташриф буюрмоқда. Чунки Европа Чемпионлар Лигаси доирасидаги баҳсда ҳар иккала жамоа ҳам ўз майдонида мағлубият аламини тортиб кўрган бўлса, ўтган ҳафтада Ла Лига доирасидаги баҳсда ҳар икки жамоа ҳам ғалаба қозонишди. Қолаверса, бугунги учрашувдаги ҳар қайси жамоанинг ғалабаси чемпионат жадвалидаги ўринга ҳам таъсир кўрсатиши мумкин. Айни дамда, Ла Лига жадвалида «Барселона» 50 очко билан 3-ўринда кетаётган бўлса, «Севилья» рақибидан бир ўйин кам ўтказган ҳолда, 48 очко тўплаб 4-поғонадан жой олган. Агар, бугун Хулен Лопетеги шогирдлари «кўк-анорранглилар» устидан ғалаба қозонадиган бўлса, кучли учликка кириб олиш имкониятига эга. Шунинг учун ҳам бу ўйиндаги қўлга киритилган очко қиймат баланд. Ҳозир биз сизларга мазкур жамоаларнинг атрофидаги янгиликлар ва эҳтимолий таркиб ҳақидаги қисқача превьюни сизларга тақдим этамиз.
«Севилия»
Айни пайтда, мазкур жамоанинг ички чемпионатдаги ишлари анча яхши. Чунки, 6 ўйинлик ғалабали серия давом эттираётган жамоа, олдидан чиққан ҳар қандай рақибни аяб ўтиргани йўқ. Аммо, шуни ҳам таъкидлаб ўтиш керакки, «қизил-оқлар» жорий йилда, айни пайтда ўзидан юқорида турган ҳеч бир жамоани чемпионат баҳсларида мағлуб эта олмаган. Каталонияликларга қарши биричи даврадаги учрашувда 1:1 ҳисобидаги дуранга имзо чеккан бўлса, «Реал»га ўз майдонида 0:1, «Атлетиоко» эса Мадридда 2:0 ҳисобида имкониятни бой берган. Бугун севилияликлар шу қора анъанани йўққа чиқариш учун майдонга тушишади. Аммо уларнинг олдида турган рақиб жиддий. Гарчи, «Барселона»ни 10 - февраль куни кубок баҳсида 2:0 ҳисобида мағлуб этишган бўлсада, бугунги баҳсда мезбонларга осон бўлмаслиги аниқ. Чунки, меҳмонлар ҳам худди «Севилья» каби Чемпионлар Лигасидан чиқиб кетиш арафасида, шунинг учун бор эътиборни ички чемпионатга қаратса керак. Лопетеги шогирдлари ўтган турда, «Осасуна» майдонига сафар уюштириб, ишончли 2:0 ҳисобидаги ғалаба билан ортга қайтишган. Ушбу қарама-қаршиликда «Севилья» рақибини ҳар томонлама мағлуб этди. Учрашувнинг 19-дақиасида Хоан Хордан бурчакдан узатиб берган тўпни, Диего Карлос боши билан дарвозага йўллаб, учрашувдаги ҳисобни очишга эришган бўлса, иккинчи бўлим бошида Лук Де Йонг жамоасининг иккинчи голини киритган. Мазкур баҳсда «Севилья» рақибидан бир бош устунлигини намойиш этди.
«Барселона»
Жорий йилги мавсумда «Барселона» бир текис ўйин намойиш этмаяпти. Баъзида аутсайдер жамоаларга қарши ўйинларда ҳам очко йўқотмоқда. Хусусан, ўтган тур «Камп Ноу»да «Кадис» жамоасини қабул қилиб, 1:1 ҳисобидаги дурангга имзо чекишди. 32-дақиқада каталонияликлар етакчиси ва сардори Лео Месси ҳисобни пенальтидан очган бўлса, 89-минутга келиб, «Барселона» ҳимоячиси Клеман Ленгле ўз жарима майдончасида қўпол ўйнаб, рақибни пенальти тепишига сабабчи бўлиб қолди. Тўп қаршисига келган меҳмонлар футболчиси Алекс зарбани аниқ амалга ошириб ҳисобни тебглаштирган ва ўйин шу ҳисоб билан якунланган. Умуман олганда, мазкур қарама-қаршиликда Куман шогирдлари ҳар томонлама устунликка эга эди. Биринчи тайм ўзида тўпга эгалик қилиши 82%ни ташкил қилиб турган бўлса, «Кадис» дарвозасига 11та зарба йўллаган. Шулардан 4таси дарвозага аниқ борган. Аммо яратилган имкониятлардан фойдалана олмаслик, меҳмонларнинг зарарига ишлади. «Барселона» мавсум аввалида ҳужумчиси Луис Суаресни «Атлетико»га қўйиб юборгандан бери, жамоанинг гол уриши қийин кечмоқда. Худди шу ҳолат 3 кун аввал 1-тур қолдирилган учрашувида майдонга тушган каталонияликлар ўз майдонида «Эльче» жамоасини қабул қилди. Гарчи, мезбонлар 3:0 ҳисобида ғалаба қозонган бўлсада, асосан голларни иккинчи таймда киритди. Эътибор берсангиз, дастлабки бўлимда 66% тўпни назорат қилган «Барселона» бор йўги икки марта дарвозага зарба йўллаган. Бу эса жамоанинг ҳужум ташкил қилишда муаммолар етарлича борлигини кўрсатади. Ўйин давомида 100 марта ҳужум уюштирган бўлиб, шулардан 29таси хавфли кўриниш олган. Охирги марта 19 январь куни гол урган Гризманн эса бир неча имкониятларни кўкка совуришда давом этиб келаяпти.
Йўқотишлар
Мазкур учрашув аввалидан, ҳар икки жамоада ҳам етарлича йўқотишлар мавжуд бўлиб, бу ҳолат бугунги ўйинга ўз таъсирини ўтказмасдан қолмайди, албатта. Мезбонлар таркибида Маркус Акуна ва Лукас Окампос каби ўйинчилар майдонга тушмайди. Ҳар иккала аргентиналик футболчилар ҳам январь ойи бошларида жароҳат олганини ҳисобга олсак, бу йўқотишлар «Севиля»га унчалик жиддий муаммо туғдирмайди. Чунки, мазкур футболчиларсиз ҳам, Лопетеги шогирдлари Кубок баҳсида каталонияликлар устидан зафар қучиушга эришган. «Барса» сафида ҳа, бир қанча йўқотишлар мавжуд бўлиб, бу ҳолатлар охирги пайтда жамоанинг минус томонига ишламоқда. Хусусан, жамоанинг бразилиялик футболчис Фелиппе Коутино 2020 - йилда жароҳат олганди, шундан бери жамоа ҳужумларида ранг-баранглик йўқолагандек. Қолаверса, Фати ва Серж Робертонинг йўқлиги жамао учун муаммо туғдириб келмоқда. Ўтган ҳафтадаги «Эльче»га қарши баҳсда эса жамаонинг босниялик футболчиси Пянич ҳам жароҳат олган ва катта эҳтимол билан бугунги баҳсни ҳам ўтказиб юборади.
Эҳимолий таркиблар
«Севилья» (4-3-3): Боно - Рекик, Диего Карлос, Кунде, Навас, Фернандо, Хордан, Торрес, Сусо, Де Ёнг, Эль - Ҳаддади
«Барселона» (4-3-3): Тер Штеген - Пике, Альба, Мингеса, Умтити, Педри, Пьянич, Френки Де Йонг, Месси, Гризманн, Брэйтуэйт.
Жамшиджон Маҳмудов тайёрлади
