Жорий йилдан эътиборан "Пахтакор" бошқарувига нидерландиялик мутахассис Питер Хюистра келди. Таркиб ҳам тубдан ўзгарди ва кетган футболчилар ўрни яхши ижрочилар билан тўлдирилди. Ҳамробеков, Машарипов, Ҳамдамов, Сергеевнинг ўрнига Рашидов, Турғунбоев, Муҳиддинов, Темиров каби футболчилар жалб этилди. Ўтган мавсумни “Бунёдкор”да ижарада ўтказган Йўлдошев эса ортга қайтарилди.

Миржалол Қосимов бошқарувидаги жамоа ҳам селекция ишларини фаол тарзда олиб борди ва таркибни янада шакллантиришга ҳамда ёшартиришга эришди. Жамоага дарвозабон Эргашев, ҳимоячилар Отахонов, Комилов, Аҳмадалиев, ярим ҳимоячилар Козак, Гадоев, Шоаҳмедов, нидерландиялик Фортес ва украиналик Касьян келиб қўшилди.

Ўзаро ўйинлар статистикасига кўра, ўтказилган жами 30 ўйинда "Пахтакор" 22 ғалабани тантана қилган, АГМК эса 5 маротаба "пахтакорчилар"дан устун келган. Қолган 3 беллашувда ғолиб номи аниқланмаган. Тўплар нисбати: 61-21, "Пахтакор" фойдасига.