Австриянинг Инсбрук шаҳрида ўсмирлар ўртасида қишки Олимпада Ўйинлари тантанали равишда очилди. 13 январь тунида Австрия президенти Ҳайнц Фишер Олимпия Ўйинларини очиқ, деб эълон қилди.
Инсбрукдаги "Бергизель" стадионда олимпия машъаласини шиддатли эниш бўйича 1964 йилги катталар олимпиадаси олтин медали соҳиби Эгон Циммерман ёқиб берди. Очилиш маросимида Халқаро олимпия қўмитаси президенти Жак Рогге кириш нутқи сўзлади.
22 январга қадар давом этувчи ўсмирлар олимпия Ўйинларида 70 мамлакатдан келган 1059 нафар атлетлар 15 спорт тури бўйича 63 комплект медаллар учун кураш олиб боришади. Дастлабки медаллар соҳиблари бугун, 14 январда аниқланади.
Ўсмирлар ўртасида қишки Олимпиада Ўйинлари спорт тарихида илк бор ўтказилмоқда. Мусобақаларда 14 ёшдан 18 ёшгача бўлган ёш спортчилар иштирок этишлари мумкин.
Қайд этиб ўтиш лозим, Олимпиадада Ўзбекистон шарафини яккаю-ягона спортчи ҳимоя қилади. Австрия, Россия, Германия, Канада, АҚШ, Финляндия каби мамлакатлардан 50 дан ортиқ ёш спортчилар иштирок этишмоқда.
