"Интер" ҳужумчиси Диего Форлан фаолиятидаги илк Милан дербисини сабрсизлик билан кутаётганини тан олди. Бу ҳақда Италия нашрлари хабар бермоқда.
Италия чемпионати 18-туридан ўрин олган "Милан" - "Интер" учрашуви 15 январь, якшанба куни, Тошкент вақти билан 00:45да бошланади. 17-тур учрашувларидан сўнг "Милан" 37 очко билан А Серияда пешқадамлик қилаётган бўлса, ҳамшаҳаридан 8 очко кам жамғарган "Интер" 5-ўринда бормоқда.
"Ушбу тўқнашувда қатнашган ҳар бир футболчи ундаги ўзига хос муҳит ҳақида сўзлаб берган. Мен мана шундай ўйинда иштирок этишни ҳар доим хоҳлаганман. Дербининг бошланишини сабрсизлик билан кутмоқдаман", деди 32 ёшли ҳужумчи.
"Интер" таркибига 2011 йилнинг ёзида келиб қўшилган Диего Форлан шу вақтгача жамоа сафида 8 та учрашувда майдонга тушиб, атиги битта гол урган.













