«Ливерпуль» ярим ҳимоячиси Жоржиньо Вейналдум ва «Лион» ҳужумчиси Мемфис Депай «Барселона»га ўтишга яқин турибди.

Diario Sport нашрининг хабар қилишича, каталон клуби ёзда эркин агентга айланадиган футболчилар билан дастлабки келишувга эришган. Трансферлар амалга ошадиган бўлса, ҳар икки футболчи «Барселона» билан 3 йиллик шартнома имзолайди.

Нидерландиялик футболчиларни олиб келишни «Барселона» устози Рональд Куман хоҳламоқда.

Вейналдум ва Депай «Барса»да президентлик сайловлари бўлмасидан олдин жамоа билан дастлабки шартномани имзолаган.

Ҳозирда келишувлар клуб директорлар кенгаши томонидан тасдиқланса бўлгани. Бироқ 30 ёшли Вейналдум борасида «Барселона» раҳбариятида саволлар бор. Бу трансфер ёш футболчиларнинг ўйин амалиётига салбий таъсир қилмаслиги муҳим. Шунингдек, «Барселона» мазкур позициядаги айрим футболчиларни (масалан, Миралем Пьянични) сотиб юборишни мақсад қилган.

Депай Лига 1 жорий мавсумида 30 та ўйин ўтказиб, 14 гол ва 9 та голли узатма муаллифига айланди. Вейналдум эса Премьер Лигадаги 29 ўйинда иккита гол урди.