Англия футбол ассоциацияси Премьер Лига клубларининг сўнгги 12 ой ичда (2020 йилнинг февралидан 2021 йил февралигача) футбол агентларига сарфлаган маблағларини ҳисоблаб чиқди, дея хабар қилмоқда The Guardian.

Умумий миқдорда жамоалар бир йил ичида агентларга 272 220 223 фунт сарфлаган. Коронавирус туфайли юзага келган молиявий инқирозга қарамай, мазкур кўрсаткич бир йил аввалгисидан ўсган — 2020 йилда бу рақам 263 368 860 фунтга тенг эди.

Агентларга энг кўп пул сарфлаган клуб «Челси» бўлди — 35 247 822 фунт. Кейинги ўринларда «Манчестер Сити» (30 174 615) ва «Манчестер Юнайтед» (29 801 555). Бу борада «Вест Бромвич» (4 222 059) ҳаммадан кам маблағ сарфлаган.

Бу вақт давомида «Челси» ўз сафига Кай Ҳаверц, Тимо Вернер, Ҳаким Зиёш ва Бен Чилуэлл каби футболчиларни қўшиб олди.