"Барселона" клуби ёзда бир қатор ўзгаришларга қўл уриш арафасида. Авваломбор, раҳбарият янги футболчиларни жамоага олиб келмоқчи. Трансферлар ойнаси яқинлашгани сайин турли тахмин ва фикрлар пайдо бўлаверади. Сўнгги чиқаётган хабарларга биноан биз бўлаётган воқеаларга изоҳ бериб ўтамиз.
Текин шартномалар
"Барселона" клуби ҳозирги молиявий муаммолар туфайли кўпроқ ёзда шартномаси ўз якунига етадиган футболчилар билан шартнома имзолашни мақсад қилган. Клуб Депай, Агуэро, Вейналдум ва Эрик Гарсия каби катта номларни қўлга киритишни режалаштирмоқда, аммо уларнинг барчасининг "кўк-анорранглилар" сафига келиб қўшилиши эҳтимоли камроқ. Жоан Лапорта клубда Ла Масиядан чиққан футболчиларга эътибор бермоқчи. Шу сабабли, улардан фақатгина бир ёки иктаси жамоага келиши ҳақиқатга яқинроқ бўлади. Асли "Барселона" тарбияланувчиси бўлган Эрик Гарсиянинг каталония клубига келиш эҳтимоли юқорироқ. Сабаби, испаниялик ҳимоячи анча ёш ва унинг клуб инфратузилмастидан хабари бор. Ҳужумчи масаласида эса клуб Агуэро ва Депайдан бирини танлашга мажбур. Чунки, клубда текин ҳужумчидан ташқари юқори потенсиалли ёш форвардни олиб келиш режаси ҳам бор.
Вейналдум масаласи эса ҳозирча мавҳум бўлиб қолмоқда. Каталония клуби ярим ҳимоясида бир қатор иқтидорлар мавжуд. Хусусан, Илайш Мориба ҳам ишончли ўйин кўрсатмоқда. Бундай ҳолатда Испан гранди ёш иқтидорларни ўсишига шароит яратиб бермоқчи ва Куманнинг собиқ шогирди "Барселона"га келмаслиги ҳам мумкин.
Сотиб юборилиши кутилаётган футболчилар
"Кўк-анорранглилар"нинг асосий режаларидан яна бири - айрим клубга кераксиз футболчиларни сотиб юбориш. Клуб Коутиньо, Гризманн, Фирпо, Брейтуэйт, Ленгле, Умтити, Нето ва ҳатто Тринкау борасидаги таклифларни ҳам кўриб чиқишга тайёр. Бу футболчиларнинг айримлари келгуси мавсумда ҳам жамоада қолиши мумкин, аммо янгиланиб бораётган "Барселона"да уларга келгуси мавсумда жой топилиши қийин.
Катта трансферлар
"Барселона" клуби ёзда катта бир трансферга қўл уриши эҳтимоли мавжуд. Суарес кетганидан сўнг жамоада юқори савияли ҳужумчи кўриниш бермади. Айни шу сабаб раҳбарият ёзда катта бир харидга қўл урмоқчи. Лапортанинг асосий мақсади Холанд, бироқ норвегиялик футболчига қизиқмаётган гранд клубни топиш қийин. Мана шу ерда яна клубнинг молиявий қийинчиликлари юзага чиқади. "Боруссия Дортмунд" футболчи учун катта пул сўрамоқда. Ҳатто, Эрлингнинг агенти Мино Райола ҳам ўзи учун катта миқдорда маблағ талаб қилмоқда. Бундай шароитда иқтисодий жиҳатдан "Барса"дан устунроқ жамоалар уни "илиб кетиши" ҳам мумкин. Вазиятга тўғри ёндашган ҳолда Лапорта бошқа голедор футболчиларни ҳам кўз остига олиб қўймоқда. Лукаку, Кейн ва Исаак каби футболчилар шулар жумласидандир.
Мессининг шартномаси
Яқин бир йил ичида клубда энг кўп муҳокамаларга сабаб бўлган мавзу Мессининг "Барселона" билан шартнома имзолаши масаласи бўлса керак. Ушбу вазият то Лео янги битимга қўл қўймагунча давом этаверади. Аргентиналик авлодлар алмашинувидан жамоани талофатсиз олиб чиқиб кетиши керак бўлади, лекин бунинг учун биринчи навбатда у клубда қолиши лозим. Бу вазиятда "кўк-анорранглилар" олдидаги устувор вазифа Леони жамоада олиб қолиш ҳисобланади.
Нима бўлган тақдирда ҳам, "Барселона" мухлисларининг келгуси мавсумдан умидлари катта. Улар ўз жамоасидан сифатли футбол ва совринлар кутишади. Шундай экан, клубга юқори савияли футболчилар зарур. Вариантлар етарлича, лекин бир қарорга кела олиш ҳам жамоа келажаги ва мухлислари учун муҳим, биз учун эса қизиқ жараён.
Худайқўлов КАРИМ тайёрлади
