2008-2009 йилги мавсумларда Тошкентнинг "Бунёдкор" жамоасида тўп сурган чилилик ҳужумчи Хосе-Луис Вильянуэва яна Ўзбекистон чемпионатига қайтиши мумкин.
Кейинчалик ўз фаолиятини Хитойнинг "Тьянцзинь-Теда" ҳамда Чилининг "Универсидад Католика" клубида ўтказган форвардга Ғузорнинг "Шўртан" клуби қизиқиш билдираётгани ҳақида маълумот бериб ўтгандик. Вильянуэва билан боғланиб, унинг ушбу таклиф борасидаги фикрлари билан қизиқдик.
"Фаолиятимдаги кескин ўсишга айнан Ўзбекистондаги фаолиятим орқали эришдим. У ерда мени ҳурмат қилишади. Шу боисдан ҳам Ўзбекистонга қайтишни жуда-жуда хоҳлардим."
"Шўртан" жамоасидан менга таклиф бўлди. Лекин баъзи масалаларда, аниқроғи оилам учун ажратиладиган уй ва машина борасида муаммолар бўлиб турибди. Ғузордаги шароитлар оиламга тўғри келадими-йўқми, буни кўриб чиқишим керак."
"Агар имкони бўлса, фаолиятимни "Бунёдкор"да давом эттиришни истардим", - деди Вильянуэва.
