Sports.ru сайтининг хабар беришича, эртага тунги соат 02.00 да бошланадиган Испания кубоги чорак финали, “Реал” – “Барселона” учрашувининг НТВ+ телеканали томонидан намойиш этилиши бўйича келишув амалга ошган.
Ўйин “НТВ-Плюс Футбол-2” (олдинги "НТВ Плюс Спорт Классика" канали ўрнида) ва “НТВ Плюс HD” каналлари орқали намойиш этилади. Учрашувни Василий Уткин шарҳлаб боради.
Ушбу ўйин транслацияси юзасидан гап сўзлар жуда авж олганди. Жумладан, “НТВ Плюс” телеканали Испания кубогини намойиш ҳуқуқига эга эмаслиги туфайли, ўтган йилги финал ўйини ҳам алоҳида сотиб олинган ва алоҳида тўлов орқали абонентларга намойиш этилган. Бу сафар ундай бўлмади ва “НТВ Плюс” абонентлари, аниқроғи юқоридаги каналларга эга бўлган телетомошабинлар қўшимча тўловсиз “Эл Классико”ни кўришлари мумкин.
Эслатиб ўтамиз, ушбу ўйиннинг МТРК “Спорт” телеканали орқали намойиш этиш мавзуси ҳали ҳам очиқлигича қолмоқда. Давлат Турдиалиев мухлисларнинг саволларига жавоб берар экан, бошқа каналлардан ўйинларнинг олиб берилаётгани борасида огоҳлантириш келганини айтган бўлса, “Турдан тургача” кўрсатувида шарҳловчи Даврон Файзиев ушбу ўйин эртаси куни 08.40 да ёзиб олинган ҳолатда кўрсатилиши мумкинлигини айтиб ўтганди.
