Бугун Европа ва Осиёдаги туркийзабон давлатлар футбол ассоциациялар раҳбарлари иштирокида видеоанжуман шаклида учрашув бўлиб ўтди.
Кун тартибига кўра, мазкур мамлакатларда футболни ривожлантириш ва оммалаштириш, терма жамоалар ҳамда клублар ўртасида халқаро мусобақаларни ташкил этиш, футбол мутахассисларини қайта тайёрлаш ва ўзаро тажриба алмашиш, футбол ассоциациялари ўртасида ҳар томонлама ҳамкорликни йўлга қўйиш масалалари кенг муҳокама қилинди.
Учрашув давомида ЎФА биринчи вице-президенти Равшан Эрматов Ўзбекистонда туркийзабон мамлакатларнинг барча ёш тоифалардаги терма жамоалари ҳамда клублари иштирокида халқаро мусобақалар ва ўртоқлик учрашувлари ташкил этиш бўйича таклиф билан чиқди.
Шунингдек, тадбир якунида футбол соҳасидаги ҳамкорликни ривожлантириш ва мустаҳкамлаш бўйича туркийзабон давлатлар футбол ассоциациялари раҳбарлари томонидан Англашув меморандуми имзоланди.
