Аргентина терма жамоаси ҳужумчиси Лионель Месси жаҳон чемпионатлари тарихидаги энг узоқ давом этган голли серия рекордини такрорлади.
Бу ЖЧ-2026 гуруҳ босқичи 2-туридан ўрин олган Аргентина — Австрия учрашувида рўй берди. Месси мазкур баҳснинг 39-дақиқасида рақиб дарвозасини ишғол қилиб, ўзининг мундиаллардаги кетма-кет олтинчи ўйинида гол урди.
Аввалроқ аргентиналик юлдуз ЖЧ-2026да Жазоирга қарши баҳсда, шунингдек, ЖЧ-2022да Франция, Хорватия, Нидерландия ва Австралия терма жамоалари дарвозаларига ҳам гол киритган эди.
Шу тариқа, Месси жаҳон чемпионатлари тарихидаги энг узоқ голли серия бўйича рекордни такрорлади. Ундан аввал бу натижа француз ҳужумчиси Жюст Фонтен ва бразилиялик форвард Жаирзиньо томонидан қайд этилган эди.
Аргентина гуруҳ босқичининг 3-тур баҳсини 28 июнь куни Иорданияга қарши ўтказади.













