Ўзбекистон Coca-Cola кубоги мусобақасининг гуруҳ босқичи 2-туридан ўрин олган "Металлург" – "Янгиер" (2:0) учрашувидан сўнг мезбонлар бош мураббийи Жасур Абдураимов матбуот анжуманида иштирок этди.

-  “Металлург”нинг ўйини аста секин ўзгариб, шаклланиб бораяпти. Аммо ҳали кўп ишлашимиз керак. Футболчиларимиз кўпроқ ўйин амалиётига эга бўлишлари лозим. Менинг фикримча биз 40-50 фоиз имкониятларимиз даражасида ўйин намойиш этаяпмиз.

Бугунги рақибимиз – “Янгиер”нинг ўйини менга ёқди. Замонавий футбол намойиш этаяпти. Бир тур олдин Суперлиганинг тажрибали жамоаси “Қўқон 1912”ни ютганди. Биз рақибнинг ўйинини кўриб чиққандик. Бугун футболчиларимиз охиригача курашганлиги менга манзур бўлди. Тўғри, ўйиннинг сифати ҳақида ҳали мақтана олмаймиз. Мақсадга эришиш учун эса вақт керак албатта. Футболчилар ўз ўйинларини топиб олишади.
 
-  Биринчи бўлимдаёқ ўйинчи алмаштирилишига сабаб нима бўлди? Чумакнинг ўйинидан қониқиш ҳосил қилмадингизми?

-  Аввалги матбуот анжуманларида ҳам таъкидлаб ўтганман, легионер футболчи маҳаллий ўйинчилардан бир бош устун бўлиши керак. Менинг футболга қарашим шу. Агар у шундай даражада ўйин кўрсата олмаса, бундай легионернинг ўрнига ёш, истеъдодли ўзбек йигитини майдонга туширганим маъқул.

-  Кейинги учрашувда “Қўқон 1912” билан ўйнайсизлар, учрашувдан нималарни кутаяпсиз?

-  “Қўқон 1912” жамоаси анча кучли рақиб. Ўз ўйин услубига эга жамоа. Кучли футболчиларни жамлаган бу жамоа ўз олдига юқори мақсадларни қўйган. Ўйлашимча, бўлғуси ўйинга келган мухлислар чиройли, қизиқарли ўйиннинг шоҳиди бўлишади.