O‘zbekiston Coca-Cola kubogi musobaqasining guruh bosqichi 2-turidan o‘rin olgan "Metallurg" – "Yangiyer" (2:0) uchrashuvidan so‘ng mezbonlar bosh murabbiyi Jasur Abduraimov matbuot anjumanida ishtirok etdi.

-  “Metallurg”ning o‘yini asta sekin o‘zgarib, shakllanib borayapti. Ammo hali ko‘p ishlashimiz kerak. Futbolchilarimiz ko‘proq o‘yin amaliyotiga ega bo‘lishlari lozim. Mening fikrimcha biz 40-50 foiz imkoniyatlarimiz darajasida o‘yin namoyish etayapmiz.

Bugungi raqibimiz – “Yangiyer”ning o‘yini menga yoqdi. Zamonaviy futbol namoyish etayapti. Bir tur oldin Superliganing tajribali jamoasi “Qo‘qon 1912”ni yutgandi. Biz raqibning o‘yinini ko‘rib chiqqandik. Bugun futbolchilarimiz oxirigacha kurashganligi menga manzur bo‘ldi. To‘g‘ri, o‘yinning sifati haqida hali maqtana olmaymiz. Maqsadga erishish uchun esa vaqt kerak albatta. Futbolchilar o‘z o‘yinlarini topib olishadi.
 
-  Birinchi bo‘limdayoq o‘yinchi almashtirilishiga sabab nima bo‘ldi? Chumakning o‘yinidan qoniqish hosil qilmadingizmi?

-  Avvalgi matbuot anjumanlarida ham ta’kidlab o‘tganman, legioner futbolchi mahalliy o‘yinchilardan bir bosh ustun bo‘lishi kerak. Mening futbolga qarashim shu. Agar u shunday darajada o‘yin ko‘rsata olmasa, bunday legionerning o‘rniga yosh, iste’dodli o‘zbek yigitini maydonga tushirganim ma’qul.

-  Keyingi uchrashuvda “Qo‘qon 1912” bilan o‘ynaysizlar, uchrashuvdan nimalarni kutayapsiz?

-  “Qo‘qon 1912” jamoasi ancha kuchli raqib. O‘z o‘yin uslubiga ega jamoa. Kuchli futbolchilarni jamlagan bu jamoa o‘z oldiga yuqori maqsadlarni qo‘ygan. O‘ylashimcha, bo‘lg‘usi o‘yinga kelgan muxlislar chiroyli, qiziqarli o‘yinning shohidi bo‘lishadi.