Футболнинг бугунги ривожланиш кўрсаткичлари нафақат мураббий ва футболчиларнинг малакаси ва маҳоратига, балки илмий-услубий таҳлил ва замонавий иновацион технологияларга ҳам боғлиқ бўлиб қолмоқда.
Шу сабабли, Ўзбекистон Суперлигаси жамоалари футболчиларнинг жисмоний ҳолатини текшириш, илмий-таҳлилий ёндошиш, кузатиб бориш ва керакли маълумотларга эга бўлиш мақсадида Жанубий Кореянинг «Fitogether» замонавий қурилмалари тўпламини сотиб олиш бўйича келишувга эришилган эди.
Кеча Ўзбекистон футбол ассоциацияси мажлислар залида Жанубий Кореянинг «Fitogether» замонавий қурилмаларини Ўзбекистонда амалиётга қўллаш юзасидан семинар ўтказилди. Унда ЎФА мутасадди ва мутахассислари ва Ўзбекистон Суперлигаси клублари таҳлилчилари билан биргаликда жанубий кореялик мутахассислар онлайн режимда иштирок этди.
Семинар давомида ЎФА илмий-услубий бўлими вакиллари ҳамда «Fitogether» компанияси мутахасислари маҳаллий таҳлилчиларга илмий-амалий ўқув машғулотлари орқали таълим берди. Ушбу тизим ёрдамида футболчиларнинг жисмоний ва функционал ҳолатини машғулотлар ҳамда мусобақалардан олдин, ўша вақтнинг ўзида ва ундан кейин мониторинг қилиб бориш имконияти пайдо бўлади.