Лондоннинг "Тоттенхэм" клуби 58 ёшли португалиялик мураббий Жозе Моуриньонинг истеъфосидан кейин янги бош мураббий излашни давом эттирмоқда. Журналист Фабрицио Романо твиттерида ёзишича, "Тоттенхэм" раҳбарлари "Аякс" жамоасининг амалдаги устози Эрик тен Хей билан юзма-юз учрашишни режалаштирган.
Қайд этилишича, 51 ёшли мураббийнинг ўзи Англияда ишлашга қарши эмас, аммо ҳозирча ҳеч нарса ҳал қилинмаган. Олдинроқ Британиянинг "The Telegraph" нашри Хейни "Тоттенхэм" бош мураббийи лавозимига асосий даъвогар деб атаганди. Номзодлар орасида Ралф Рангник, Нагелсманн, Англия бош мураббийи Гарет Саутгейт ва Бельгия терма жамоаси этакчиси Роберто Мартинес бор эди.
Эслатиб ўтамиз, Моуриньо кетганидан сўнг, клубнинг собиқ футболчиси Райан Мейсон "Тоттенхэм" бош мураббийи вазифасини бажарувчига айланганди.
