"Барселона" сардори Лионель Месси Испания чемпионатининг 34-тури доирасида бўлиб ўтган "Валенсия"га қарши ўйинда (3:2) пенальтидан гол ура олмади.
Баҳснинг 57-дақиқасида аргентиналик футболчи 11 метрли жарима зарбасини тепди, аммо "кўршапалаклар" посбони Яспер Силлессен зарбани қайтарди. Шунга қарамай, каталонияликлар ушбу ҳужумни голга айлантиришди: Педрининг зарбасидан сўнг ҳимоячи қайтарган тўпни Месси дарвозага жойлаб қўйди.
"MisterChip" тарқатган хабарга кўра, Месси фаолиятидаги самарали фойдалана олмаган пенальтилар сони 29тага етди (ўйиндан кейинги пенальтилар сериясини қўшиб ҳисоблаганда). Ушбу кўрсаткич бўйича у "Ювентус" ҳужумчиси Криштиану Роналду билан тенглашиб олди.
Маълумот ўрнида. Месси фаолияти давомида 132 марта пенальтини тепган бўлса, Роналду 170 марта "нуқта"га яқинлашган.
