Бирлашган Араб Амирликларининг Дубай шаҳрида янги чемпионатга тайёргарлик кўраётган Ғузорнинг “Шўртан” клуби кунига икки маҳалдан машғулотлар олиб бормоқда.

Эрталабки машғулотлар ҳамюртимиз Азиз Ҳайдаров тўп сураётган “Аш-Шабаб” стадионида ўтказилаётган бўлса, кечки машғулотлар эса афсонавий футболчи – Диего Армандо Марадона бошчилик қилаётган “Ал-Васл” клуби стадионида бўлиб ўтмоқда. Клуб бош мураббийи Игорь Криушенко футболчиларнинг тактик ва жисмоний тайёргарликларига кўпроқ урғу бермоқда.

Эртага, яъни, 22 январ куни режага мувофиқ “Шўртан” клуби Дубайдаги дастлабки ўртоқлик учрашувини ўтказади.

Шу кунги рақиб Бирлашган Араб Амирликлари чемпионатида иштирок этаётган “Ажман” клуби бўлади. 22 январь кунги рақибларимиз шу кунгача БАА чемпионатида 11 учрашув ўтказиб, 3 марта ғалаба қозонган, 3 марта дуранг ўйнаган ва 5 учрашувда мағлуб бўлиб, 12 очко жамғарган ҳолда турнир жадвалининг 9-ўрнини эгаллаб турибди.

“Шўртан” Дубай йиғини мобайнида 4 та ўртоқлик учрашуви ташкил этиши ҳақида хабар бериб ўтгандик. “Оқ бўрилар”нинг кейинги ўртоқлик ўйини 26 январь куни Дубайдаги “Ал Шабаб” стадионида Санкт–Петербургнинг “Зенит” клубига қарши ўтказилади.

Одилбек Толипов