"Ливерпул" бош мураббийи Кенни Далглиш "Болтон"га қарши Англия Премьер-лигаси 22-тури доирасида бўлиб ўтган ўйин ҳақида ўз фикрларини билдириб ўтар экан, мағлубиятнинг асосий сабаби сифатида футболчиларнинг ўйинга руҳан тайёр бўлмаганликларни эътироф этди.
"Мени ҳаммасидан ҳам футболчиларим бу учрашувда ўйнашга тайёр бўлмаганликлари ранжитди. Бизнинг ўйинга бўлган руҳий тайёргарлигимиз ва майдондаги ҳаракатларимиз бу ўйинда нотўғри эди. Ҳар қандай жамо мувоффақиятининг асоси, рақибга нисбатан ҳурмат, ҳар бир ўйинга энг муҳим ўйин сифатида муносабатда бўлиш ҳисобланади".
"Агар футболчилар шунчаки ўйинга ташриф буюриб, осонликча уч очко билан қайтаман деб ўйлаган бўлишса, бу улар учун яхши дарс бўлди. Агар ҳақиқатдан ҳам айнан мана шу нарса асосий муаммо бўлган бўлса ва айрим футболчилар бу ўйинни муҳим эмас деб ҳисоблашган бўлишса, бундайлар жамоада бошқа бўлмайди".
"Мен ҳеч қачон шогирдларимдан ўйин ҳақидаги фикрларини сўрамаганман. Энди эса ҳар бир ўйин олдидан уларнинг ўйин ҳақидаги фикрларига баҳо бераман. Уларнинг рақибни менсимасликка умуман ҳақлари йўқ".
"Ўйинни ҳали бошланмасдан аввал бой бергандик. Бу баҳсни шогирдларим "Манчестер Сити"га қарши ўйиндек муҳим эмас, деб билишгани мағлубиятимизнинг асосий сабабидир", дея унинг сўзларидан The Telegraph иқтибос келтирмоқда.